Cuento En Guarani

"Omanórõko opyno va'erã" (tetãgua remimombe'u)
Mombe'uha: Domingo Aguilera
Ka'aguy pa'ũme, jahupytývo tuicháva yvype, oĩ peteĩ ykua kakuaa, opaite tymba ka'aguy hoy'uha. Upéinte, peteĩ ko'ẽme,ahy'o sorópe osapukái sapy'a jaguarete ha he'i:
– Ko'águi che añóntema hay'úta ko'ápe, che mba'éma ko ykua.
Upete guive, hapicha ka'aguy kuéra ndojavéiva upe y rembe'ýpe. Jaguarete katu, pyhareveasajévo, katuete oguejy upépe hoy'u.
Upéi peteĩ árape, oguejy jeývo jaguarete, ojuhu ityai pe y ha oĩ pypore upe ijerérehe. Oma'ẽ ma'ẽ upérupi ha ohecháma katu ka'i kuéra oguejy hague hoy'u ijykuápe ra'e."Ko'ãvape amokasõta" he'i jaguarete ha opyta omanguea hese kuéra yvyraguýpe. Upe árape ndoguejýi ni peteĩ ka'i y rembe'ýpe.
Upémarõ, aremi ndohovéi avei jaguarete ykuápe, ha upe aja ojepy'amongetamba'éicha pa ka'i kuérape oitýta ivokópe.
Peteĩ pyhareve asaje jaguarete oguejy jey, ha pe ykua rapépe oho oñeno, ojepysopaite, ku omanoitéramo guáicha. "Oñemo'aguĩvo chehegui, apóta hi'ári kuéra",he'i ijupe ha oñemongete.
Upéi oguahẽ ka'i kuéra, ombiriki joa oúvo, ha ohechávo ojepyso jaguarete hína upépe, he'i peteĩva:
– Ma'ẽ, omanómbo tapicha jaguarete ápe ra'e.
Ojere mombyrymínte voi chuguika'i kuéra, ojere jere hese hikuái. Upéi oja'imie peteĩ ka'i kuña ha opoko hese: ojapysaka jaguarete py'árehe, ohendu haĝua naipytuhẽipa.
Oñandúvo upéa "omanóva", ojokoite ipytu, ha he'i ipy'ápe:"Aha'arõta oñembojapa hikuái, apo haĝua hi'ári kuéra". Upe aja mokõiha ka'i ojapysaka hye, itĩ, ha ijapysárehe. Jaguarete katu itáicha okirirĩ.
Upévo oja avei ijypýpe ka'i ipiãivéva ha osapukái:
–Péa nomanói, péa nomanói! –he'i ndaje–, oimérõ añete omano ningo, opyno va'erã.
Ohendúvo upéa, oña'ã jaguarete, ha... puuu puuuuu! opyno.
Upémarõ oja ka'i ruvicha ha he'i ta'ýra kuérape:
– Peipokua hapeipykua, ha jagueraha japoi chugui ko ka'aguy yvate, hetaite oĩhápe guasu'i, tovy'ami hikuái ohechávo omanoha jaguarete. Upépe jajoráta chugui ikupy sã.
Ohekýi ysypo ka'i ruvicha, ha oipykua ha...