La abadesa encinta

Sennores e amigos companna de prestar
De que Dios se vos quiso traer a est logar,
Aun si me quissiessedes un poco esperar,
En un otro miraclo vos querria fablar.


De un otro miraclo vos querria contar
Que fizo la Gloriosa estrella de la mar:
Si oirme quisieredes, bien podedes iurar
Que de meior boccado non podriedes tastar .


Ennos tiempos derechos que corria la verdat,
Que nondiçien por nada los omnes falsedat,
Estonz vivien a buenas, vinien a vegedat,
Vedien a sus trasnietos en septima edat.


Façie Dios por los omnes miraclos cutiano,
Ca non querie ninguno mentir a su xpiano,
Avien tiempos derechos ivierno e verano,
Semeiaba el sieglo que todo era plano.


Si pecaban los omnes, façien bien penitençia,
Perdonabalis luego Dios toda la malquerençia,
Avien conJesu Xpo toda su atenençia:
Quierovos dar a esto una buena sentençia.


De una abbatissa vos quiero fer conseia,
Que peccó en buen punto commo a mi semeia,
Quissieronli sus duennas revolver mala çeia,
Mas nol empedeçieron valient una erveia.


En esta abbadesa iaçie mucha bondat,
Era de grant recabdo e de grant caridat,
Guiaba su conviento de toda voluntat,
Vivient segunt regla en todaonestat.


Pero la abbadesa cadió una vegada,
Fizo una locura que es mucho vedada,
Pisó por su ventura yerba fuert enconada,
Quando bien se catído, falló se embargada.


Fol creçiendo el vientre en contra las terniellas,
Fueronseli façiendo peccas ennas masiellas,
Las unas eran grandes, las otras mas poquiellas,
Ca ennas primerizas caen estas cosiellas.


Fo de las companneras lacosa entendida,
Non se podie çelar la flama ençendida,
Pesaba a las unas que era mal caida,
Mas plaçielis sobeio a la otra partida.


Apremiabalas mucho, tenielas ençerradas,
E non les consintie fer las cosas vedadas:
Querrien veerla muerta las locas malfadadas,
Cunte a los prelados esto a las vegadas.


Vidieron que non era cosa de encobrir,
Si non, podrie de todas el diablo reir:Embiaron al bispo por su carta deçir
Que non las visitaba, e debielo padir .


Entendió el bispo enna mesageria,
O que avien contienda, o fiçieron follia:
Vino fer su offiçio, visitar la mongia,
Ovo a entender toda la pletesia.


Deiemos al obispo folgar en su posada,
Finque en paz e duerma elli con su mesnada:
Digamos nos que fizo la duenna embargada,
Ca sabia que otro dia seriaporfazada.


Çerca de la su camara do solia albergar,
Tenia un apartado, un apuesto logar:
Era su oratorio, en que solia orar,
De la Gloriosa era vocaçion el altar.


Y tenia la imagen de la Sancta Reigna,
La que fue para el mundo salut e mediçina:
Teniala afeytada de codrada cortina,
Ca por todos en cabo essa fue su madrina.


Sabia que otro dia seria mal porfazada,
Non avia algunaescusa a la cosa probada,
Tomó un buen conseio la bienaventurada,
Esto fue maravilla commo fue acordada.


Debatiose en tierra delante el altar,
Cató a la imagen, empezó a llorar:
Valme, dixo, Gloriosa, estrella de la mar:
Ca non e nul conseio queme pueda prestar.


Madre, bien lo leemos, diçelo la escriptura,
Que eres de tal gratia e de tan grant mesura
Que qui de voluntat te diçe surencura,
Tu luego li acorres en toda su ardura.


Entró al oratorio ella sola sennera,
Non demandó consigo ninguna compannera,
Paróse desarrada luego de la primera;
Mas Dios e su ventura abrieronli carrera.


Tu acorriste, sennora, a TheophiJo que era deseperado
Que de su sangre fizo carta con el peccado:
Por el tu buen conseio fue reconçiliado,
Onde todos los omnes te lo tienen a grado.Tu acorriste, sennora, a la Egiptiana,
Que fue peccador mucho, ca fue muger liviana:
Sennora benedicta, de qui todo bien mana,
Dame algun conseio ante de la mannana.


Sennora benedicta, non te pódi servir;
Pero amete siempre. laudar e bendeçir:
Sennora, verdat digo e non cuydo mentir ,
Querria seer muerta s y podiesse morir.


Madre del Rey de gloria de los çielos Reigna,...