romeo y julieta

Al rrey ondrado delant le echaron las cartas;
quando las vio de coraçón se paga:
«Saludadme a Mío Çid el que en buen ora çinxó espada;
sean las vistas d’estas III semanas;
s’yo bivo so alí iré sin falla.»
Non lo detardan, a Mío Çid se tornavan.
D’ella part & d’ella pora las vistas se adobavan:
¿quien vio por Castiella tanta mula preçiada
e tanto palafré que bien anda,
cavallos gruessos& coredores sin falla,
tanto buen pendón meter en buenas astas,
escudos boclados con oro & con plata,
mantos & pielles & buenos çendales d’Andria?
Conduchos largos el rrey enbiar mandava
a las aguas de Tajo o las vistas son aparejadas.
Con el rrey a tantas buenas conpannas.
Los iffantes de Carrión mucho alegres andan,
lo uno adebdan & lo otro pagavan;
commo ellos teníen creçerles ía laganançia,
quantos quisiessen averes d’oro o de plata.
El rrey don Alfonsso apriessa cavalgava,
cuendes & podestades & muy grandes mesnadas;
los ifantes de Carrión lievan grandes conpannas.
Con el rrey van leoneses & mesnadas galizianas;
non son en cuenta sabet, las castellanas.
Sueltan las rriendas, a las vistas se van adelinnadas.
104.
Dentro en Vallençia Mío Çid el Campeador
non lodetarda, pora las vistas se adobó:
¡tanta gruessa mula & tanto palafré de sazón,
tanta buena arma & tanto buen cavallo coredor,
tanta buena capa & mantos & pelliçones!
Chicos & grandes vestidos son de colores.
Minaya Álbar Fánnez & aquel Pero Vermúez,
Martín Munnoz & Martín Antolínez el burgalés de pro,
el obispo don Jerónimo coronado mejor,
Álvar Álvarez & Álvar Savadorez,
Munno Gustioz elcavallero de pro,
Galind Garçíaz el que fue de Aragón:
estos se adoban por ir con el Campeador
e todos los otros que i son.
Álvar Salvadórez & Galind Garçíaz el de Aragón
a aquestos dos mandó el Campeador
que curien a Valençia d’alma & de coraçón
& todos los que en poder d’essos fossen;
las puertas del alcáçar que non se abriessen de día nin de noch,
dentro es su mugier & sus fijas amas ados
en que tiene su alma & su coraçón,
e otras duennas que las sirven a su sabor;
rrecabdado ha commo tan buen varón
que del alcáçar una salir non puede
fata que s’ torne el que en buen ora nascó.
Salíen de Valençia, aguijan & espolonavan:
tantos cavallos en diestro gruessos & corredores
Mío Çid se los gannara, que no ge los dieran en don.
Hya s’ va pora las vistas que con el rrey paró.De un día es legado antes el rrey don Alfonsso;
quando vieron que viníe el buen Campeador
reçebirlo salen con tan grand onor.
Don lo ovo a ojo el que en buen ora nascó
a todos los sos estar los mandó
si non a estos cavalleros que queríe de coraçón;
con unos XV a tierras firió
commo lo comidía el que en buen ora naçió;
los inojos & las manos en tierra los fincó,
las yerbas del campo adientes las tomó
lorando de los ojos, tanto avíe el gozo mayor,
así sabe dar omildança a Alfonsso so sennor.
De aquesta guisa a los pies le cayó.
Tan grand pesar ovo el rrey don Alfonsso:
¡Levantados en pie ya Çid Campeador!
Besad las manos, ca los pies no;
si esto non feches non avredes mi amor.»
Hinojos fitos sedíe el Campeador:
«¡Merçed vos pido a vos mío natural sennor!
Assí estandodédesme vuestra amor,
que lo oyan quantos aquí son.»
Dixo el rrey: «¡Esto feré d’alma & de coraçón!
Aquí vos perdono & dovos mi amor,
en todo mío rreino parte desde oy.»
Fabló Mío Çid & dixo:
«¡Merçed! Yo lo rreçibo, Alfonsso mío sennor;
¡gradéscolo a Dios del çielo & después a vos
e a estas mesnadas que están a derredor!»
Hinojos fitos las manos le besó,
levos’ en pie & en la boca l’ saludó.Todos los demás d’esto avíen sabor;
pesó a Álbar Díaz & a Garçi Ordónnez.
Fabló Mío Çid & dixo esta rrazón:
«¡Esto gradesco al Criador
quando he la graçia de don Alfonsso mío sennor;
valerme a Dios de día & de noch!
Fuéssedes mi huésped si vos plogiesse, sennor.»
Dixo el rrey: «Non es aguisado oy;
vos agora legastes & nos viniemos anoch;
Mío huésped seredes, Çid Campeador,
e cras...